Procesi I Legalizimit 2026 — Afati 2028, Procedura dhe Kostot

Legalizimi i objekteve të ndërtuara pa leje në Shqipëri ka afat ligjor mbylljeje vitin 2028. Në gjashtëmujorin e parë të 2026-s, ASHK miratoi 17,396 vendime legalizimi — ritëm më i lartë se në vitet 2023–2024. Dosja kërkon plan rilevimi nga gjeodet i licensuar dhe verifikim kadastral paraprak.

Legalizimi i objektit — ku ndodhemi në 2026

Drejtoresha e ASHK-së ka deklaruar se afati ligjor për mbylljen e të gjitha praktikave të legalizimit është viti 2028. I njëjti afat vlen edhe për procesin e regjistrimit fillestar të pronave.

Ritmi është përshpejtuar ndjeshëm. Vetëm në gjashtë muajt e parë të 2026-s u miratuan 17,396 vendime — numër më i lartë se ai i viteve 2023 dhe 2024. Për ata që kanë dosje në pritje, ky është lajm i mirë. Për ata që ende nuk kanë aplikuar, është sinjal se dritarja po mbyllet.

Në terma praktikë: një procedurë legalizimi që kalon nëpër matje, verifikim kadastral, aplikim dhe shqyrtim institucional nuk mbyllet brenda javësh. Dy vjet nuk janë periudhë e gjatë për këtë proces.

Kush mund të aplikojë për legalizim

Objektet e ndërtuara pa leje, ose ato që kanë tejkaluar lejen ekzistuese me shtesa të paautorizuara, hyjnë në procedurë legalizimi. Kjo përfshin banesa individuale, shtesa mbi objekte ekzistuese, objekte ndihmëse dhe njësi shërbimi.

Nuk legalizohen objektet që bien në zona me kufizime ligjore — brez bregdetar i mbrojtur, zona të mbrojtura mjedisore, sipërfaqe të destinuara për infrastrukturë publike — ose ato që paraqesin rrezik strukturor për banorët dhe fqinjët.

Pse ngecin dosjet e legalizimit

Nga eksperienca jonë në terren, shkaqet janë pothuajse gjithmonë të njëjtat tri:

Matja nuk përputhet me hartën kadastrale. Ky është problemi më i madh i sistemit. ASHK-ja ka pranuar publikisht se mbi 80% e territorit të Shqipërisë ka problematika me hartat kadastrale — kryesisht mbivendosje. Kur dosja juaj bie mbi një zonë problematike, verifikimi zgjat dhe kërkon dokumentacion shtesë.

Dokumentacioni i paplotë. Mungon një deklaratë kufitari, një dokument identiteti është i skaduar, ose plani i rilevimit është hartuar pa u parë harta treguese paraprakisht.

Objekti ka probleme teknike ose pozicionale. Ndërtimet mbi infrastrukturë publike, brenda distancave të ndaluara ose me probleme strukturore nuk kalojnë pavarësisht dokumentacionit.

Roli i planit të rilevimit në legalizim

Plani i rilevimit është dokumenti bazë i çdo dosjeje legalizimi. Ai përcakton sipërfaqen e objektit, sipërfaqen e truallit funksional dhe pozicionin e saktë në koordinata shtetërore.

Këtu bëhet dallimi mes një dosjeje që kalon dhe një që kthehet: verifikimi kadastral duhet bërë përpara daljes në terren, jo pas refuzimit. Nëse harta treguese tregon mbivendosje me pronën fqinje, kjo duhet ditur ditën e parë — jo tre muaj më vonë, kur dosja kthehet dhe procesi rinis.

Çfarë të bëni nëse keni objekt të palegalizuar

1.     Kontrolloni nëse keni aplikuar dikur. Shumë familje kanë aplikuar në vitet e ALUIZNI-t dhe e kanë harruar. ASHK-ja publikon rregullisht lista të vendimeve të patërhequra sipas drejtorive vendore — kontrolloni listën e zonës suaj.

2.     Nëse nuk keni aplikuar, mos prisni. Afati 2028 nuk është i largët për një proces me disa faza verifikimi.

3.     Nisni nga matja dhe verifikimi kadastral, jo nga aplikimi. Një dosje e ndërtuar mbi rilevim të saktë ecën; një dosje e nisur me nxitim kthehet.

Sa kushton legalizimi i një objekti

Kostoja ka dy komponentë: tarifat institucionale, të përcaktuara me akt nënligjor, dhe kostoja e dosjes teknike — matja, plani i rilevimit dhe përgatitja e dokumentacionit. Kjo e dyta varet nga sipërfaqja e objektit, aksesi në terren dhe kompleksiteti i situatës kadastrale.

Pyetje të shpeshta për legalizimin

Sa zgjat procedura e legalizimit?

Varet nga ngarkesa e drejtorisë vendore dhe nga gjendja kadastrale e zonës. Dosja teknike përgatitet brenda ditësh; shqyrtimi institucional është pjesa që nuk kontrollohet nga ne.

A mund të legalizoj një objekt që e kam blerë por nuk është në emrin tim?

Varet nga dokumenti me të cilin e keni blerë — kontratë, deklaratë, dëshmi trashëgimie. Sillni çfarëdo keni dhe e shohim bashkë përpara se të nisni procedurën.

Jetoj jashtë Shqipërisë. A mund të legalizoj nga larg?

Po. Procedura kryhet me prokurë noteriale, pa praninë tuaj fizike.

Objekti im është mbi tokë bujqësore. A legalizohet?

Varet nga zona, nga statusi i tokës dhe nga kufizimet e planifikimit territorial. Kërkon verifikim rast pas rasti.